Blog

खोलानाला वन कुसुमले देश नेपाल राम्रो

दिव्यात्माको उदय थल हो मातृ भूस्वर्ग हाम्रो ।

चाँदीजस्ता हिमशिखर छन् लोभ लाग्दा सुदृश्य

बग्छन् झर्झर् प्रणय ममता देश नेपाल भव्य ।

मेचीकाली अविरल बगी देश रक्षा गरेका

चारैतर्फी निर पवनले प्राण हाम्रो भरेका ।

सेलो रोदी लय हृदयका देउडा गीत हाम्रा

पञ्चेबाजा सुरसुरति हुन् चेतना कन्दराका ।।

शेर्पा क्षेत्री मगर ठकुरी थारु नेवार राई

लिम्बू कामी गुरुङ सब हौँ एउटै दाजुभाइ ।

गौरा होली छठ इद दशैँ, इन्द्रजात्रा र माघी

रम्छौँ हामी सबजन यहाँ पर्व ल्होसार मानी ।।

मेरा आँखा मन हृदयमा देश नेपाल राख्छु

सारा ऊर्जा रगत पसिना शिल्प जम्मै म पोख्छु ।

यौटा यस्तो अमर रहने कर्म राम्रो म गर्छु

मेरो प्राणै बरु किन नहोस् देशको प्राण भर्छु ।।