Blog

भक्तपुरका कला र संस्कृति ः यसको संरक्षण एम्.भि.ए.को दूरदृष्टि भन्ने मूल नाराका साथ महेन्द्र विद्या आश्रमले तिहार विशेष कार्यक्रम भव्यताका साथ सम्पन्न गरेको छ । कार्यक्रम मिति २०७९साल ०७ महिना ६ गते आइतबारका दिन गरिएको थियो । कक्षा नर्सरीदेखि दशसम्मका सम्पूर्ण विद्यार्थीको सभागिता रहेको कार्यक्रममा महेन्द्र विद्या आश्रमका कार्यकारी निर्देशक श्री महेन्द्रप्रसाद मास्के, वित्तीय निर्देशक श्री किरण मास्के, प्रमुख प्रशासकीय अधिकृत श्री सम्राट मास्के, प्रधानाध्यापक श्री अनिल श्रेष्ठ, भादगाउँ टेलिभिजनका पत्रकार प्रतिनिधि तथा सम्पूर्ण शिक्षकको गौरवमय उपस्थिति रहेको थियो । कार्यक्रममा लक्ष्मीपूजा, देउसी भैलो, म्हः पूजा एवम् पुरस्कार वितरण कार्य गरिएको थियो । विद्यालयका संस्थापक एवम् वित्तीय निर्देशक श्री किरण मास्केज्यूले लक्ष्मीपूजा गर्नुभए पश्चात् नर्सरीदेखि कक्षा दशसम्मका विद्यार्थी र शिक्षकबाट क्रमशः लक्ष्मीपूजा गरिएको थियो । लक्ष्मीपूजा सम्पन्न भएपछि अन्तर विद्यालय देउसी भैलो प्रतियोगितामा प्रथम स्थान हासिल गर्न सफल यस विद्यालयका भाइबहिनीहरूले आफ्नो साङ्गीतिक प्रस्तुति देउसीभैलो गीत र नृत्य प्रस्तुत गरेका थिए । विद्यालयका नर्सरीदेखि कक्षा तीनसम्मका जम्मा १८८ जना विद्यार्थीले म्हपूजा गरेका थिए । पूजामा मुलीको भूमिका विद्यालय विद्यार्थी प्रतिनिधि श्री करुणा राईले निर्वाह गर्नुभएको थियो । म्हः पूजाको सांस्कृतिक तथा वैज्ञानिक महत्त्व, यसको पूजाविधि र यसबाट हामीले सिक्नुपर्ने कुराहरु उल्लेख गर्नुहुँदै विद्यालयका प्रधानाध्यापक श्री अनिल श्रेष्ठले पूजाको सहजीकरण गर्नुभएको थियो । पूजा गराउने काममा कक्षा नौ र दशका छात्राहरुले सहयोग गरेका थिए । सम्पूर्ण शिक्षक र विद्यार्थी आआफ्ना सांस्कृतिक पोसाकमा सुसज्जित थिए ।